ما هو الذكاء الاصطناعي

0 13

إيه موضوع الذكاء الصناعي ده واستخدام جوجل ليه بشراهة حاليا؟

لو روحت على جوجل ودوست على علامة المايك واتكلمت باللهجة المصرية وقولت مثلا “بطل تناكة يا عم” هتلاقي جوجل بكل بساطة سمعت صوتك وكتبت الكلمات دي بالحرف!

طب إزاي جوجل فهمت اللهجة المصرية وعرفت أي كلمات جديدة بيتم استحداثها؟ مرحبا بيك في عالم الذكاء الصناعي!

جوجل بتستخدم أساليب في البرمجة تندرج تحت مسمى الذكاء الصناعي AI والتعلم الآلي Machine Learning ودول بيدوها قوة رهيبة في حاجات كتير.

مثلا لو في لغة جديدة ظهرت وجوجل عايزة تفهرس صفحاتها وتصنفها وترتبها علشان تدرجها في نتائج البحث أو لو في كلمات جديدة ظهرت في أي لغة أو جوجل عايزة تفسر لهجات العربي المنطوقة باللهجات العربية المختلفة، كل ده جوجل كان استحالة تقدر تعمله من غير استخدام تقنيات التعلم الآلي Machine Learning.

طب خد عندك دي، جوجل بتدخل جوة فيديوهات اليوتيوب وتسمع اللي بيتقال وبتقارنه بعنوان الفيديو ووصفه وتعرف إذا كنت كاتب عنوان مالوش علاقة بالكلام اللي بتقوله جوة الفيديو!

المزيد من المشاركات
1 من 3

طبعا جوجل أشطر بكتير في كدة مع الإنجليزي لكن العربي بتاعها عمال يتحسن وهييجي اليوم اللي تبهرك فيه.

——————————————–
طب إيه علاقة كل ده بالسيو SEO انت بتسأل؟

حبيب قلبي، ماهو نفس تقنيات ال Deep Learning (وده أحد أساليب التعلم الآلي بس مش عايز أدوس جامد في تفاصيله التقنية هنا) هو نفسه بيستخدموه في محرك البحث علشان يقيّم الموقع بتاعك وصفحاته.

طب وده معناه إيه برضو؟

معناه إن جوجل هتفضل تتعلم وتحسن من نفسها ومهما حاولت تخدعها هتعرف تفقسك في التحديث اللي بعده وساعتها انت هتقع وتنهار لو كنت ماشي غلط وبتحاول تتفزلك.

جوجل بتتعلم من الناس اللي بيزوروا موقعك فلما الناس تحب موقعك جوجل هتحبك هي كمان.

الخلاصة: خليك ناصح والعبها صح علشان تفضل جوجل تحبك وما تخسفش بموقعك يوما ما.

وعلى فكرة، بمناسبة التعلم الآلي جوجل تقدر تتعلم اللغة العربية المصرية المكتوبة بكل سهولة يعني لو حبيت تكتب زي ما أنا باكتب كدة برضو جوجل هتجيبك.

اترك رد

لن يتم نشر عنوان بريدك الإلكتروني.