ما هو سعر المقالة

0 14

ما سعر المقالة الحصرية ٣٠٠ كلمة والتي تراعي شروط السيو؟

لاحظت إن في ناس كتير بتقدم خدمة كتابة المقالات وبتعرض أسعارها وبتقول إنها مقالات حصرية وبتراعي قواعد السيو وبتقدم مقالات بالعربي وفي بيقدموا إنجليزي كمان وفي البعض بيقدم في مجالات متخصصة محددة والمقالات بتكون ٣٠٠ أو ٥٠٠ أو حتى ١٠٠٠ كلمة.

كل ده جميل لكن اللي فجعني انخفاض الأسعار! المقالة بدولار وفي أرخص كمان! هو في إيه!

طبعا كل حد حر في أسعاره وبين البايع والشاري يفتح الله.

أنا هنا هقول رأيي بصراحة: أنا شايف إن الأسعار المتدنية دي بتضر:
١- كاتب المحتوى
٢- صاحب الموقع
٣- القاريء
٤- المعلن

علشان نفهم الموضوع أكتر تعالوا نتخيل العكس:

طالب جامعي اشتغل في محلات بيع موبايل وعنده خبرة كبيرة بالموبايلات وأنواعها ومميزاتها وعيوبها والفروقات ما بينها ونوعية زباين كل فئة منها.

ودعونا نتخيل إن في حد عامل موقع والمحتوى بتاعه خاص بالموبايلات. وراح اتفق مع الولد اللي عنده خبرة في الموبايلات ده إنه يكتبله مقالات حصرية عن الموبايلات المختلفة وتكون مفصلة وجايبة من الآخر ومافيش زيها ومحتوى حصري حصري يعني وعميق والمقالة في حدود ١٠٠٠ كلمة.

في رأيي إن لو صاحب الموقع ده جاد وشاطر في المواقع ممكن يدفع مش أقل من ١٠٠ جنيه في المقالة الواحدة وهيكون كسبان جدا كمان على المدى البعيد.

تعالوا نشوف إيه اللي حصل:
– كاتب المقالة استفاد بخبرته ومجال شغفه وكسب أكتر وحس إنه قدم حاجة عليها القيمة تنفع الناس ويفتخر بيها
– صاحب الموقع جاب محتوى حصري رائع التميز وكسب أضعاف من عدد زيارات متضاعف وإعلانات سعرها أحسن
– زائر المحتوى لقى في مكان واحد وصف عميق وساعده ياخد القرار صح فاستفاد جدا
– المعلن جاله جمهور حقيقي نسبة حلوة منه جادة وعايزة المنتج بتاعه

وبكده نكون ارتقينا بصناعة المحتوى إللي هي روح النت أصلا بدل ما بنقطع في بعض كدة والكل خسران.

ما تستغربش لما تلاقي نفسك بتعافر مع الأرباح وانت كل اعتمادك على إنك تجيب مقالات بأرخص سعر.

في النهاية أحب أقول أنا مش باحجر على رأي حد ودي مجرد وجهة نظري وكل واحد حر يبيع ويشتري بالسعر اللي هو عايزه طالما الطرفين متراضيين حتى لو المقالة ب ٥ جنيه!

اترك رد

لن يتم نشر عنوان بريدك الإلكتروني.